Menaxhimi i MbetjeveKrim mjedisor në Këlcyrë. Dhjetëra krerë bagëti të ngordhura hidhen në përrua, banorët denoncojnë ndotjen mjedisore
Një situatë shqetësuese mjedisore është denoncuar në fshatin Psar, në Bashkinë e Këlcyrës, ku dhjetëra krerë bagëti të ngordhura janë hedhur në përroin e fshatit, duke shkaktuar ndotje të rëndë dhe shqetësim të madh për banorët e zonës. Sipas banorëve, mbetjet e bagëtive janë të depozituara prej rreth një muaj e gjysmë në përroin e fshatit. Kjo situatë ka sjellë jo vetëm ndotje të konsiderueshme të ujërave dhe mjedisit përreth, por edhe rrezik serioz për shëndetin publik, për shkak të mundësisë së përhapjes së infeksioneve dhe sëmundjeve të ndryshme. Ngjarje të tilla nuk janë raste të izoluara, por fatkeqësisht po shfaqen në mënyrë të përsëritur në disa zona të ndryshme të Shqipërisë, sidomos në zona rurale ku mungon kontrolli i duhur dhe menaxhimi i mbetjeve me origjinë shtazore. Kjo tregon një problem më të gjerë në zbatimin e rregullave veterinare dhe mjedisore, si dhe nevojën për ndërhyrje më të fortë institucionale për të parandaluar praktika të tilla të rrezikshme. Banorët shprehin shqetësimin e tyre jo vetëm për ndotjen e përroit dhe dëmtimin e natyrës, por edhe për rrezikun afatgjatë që kjo sjell për ujin, tokën dhe aktivitetet bujqësore në zonë. Situata të ngjashme kërkojnë vëmendje urgjente dhe masa konkrete për menaxhimin e duhur të kafshëve të ngordhura dhe mbrojtjen e mjedisit. Ndiq videon e raportimit nga A2 CNN direkt nga terreni në linkun: https://youtu.be/jv8ppUiNO5A?si=zvev50HCV0cPy47A Burimi: A2CNN
Menaxhimi i MbetjeveSkandal mjedisor: Aktiviteti i kompanisë minerare pezullohet për menaxhim të gabuar të mbetjeve
“Albchrome”një kompani që operon në industrinë minerare është ndëshkuar me gjobë dhe me pezullim të përkohshëm të aktivitetit, pas konstatimit të shkeljeve në trajtimin e mbetjeve të rrezikshme në ambientet e kompanisë në Elbasan. Inspektorati Kombëtar i Mbrojtjes së Territorit (IKMT), përmes Drejtorisë Rajonale në Elbasan, zhvilloi një inspektim në subjektin “Albchrome”, me fokus mënyrën e menaxhimit dhe trajtimit të mbetjeve industriale të krijuara nga aktiviteti i kompanisë. Gjatë kontrollit, inspektorët konstatuan se në ambientet ku ushtron aktivitetin kompania ishin magazinuar rreth 318 tonë mbetje të rrezikshme, të dala nga sistemi i kapësit të pluhurit (dust collector). Sipas IKMT-së, këto mbetje konsiderohen me risk të lartë për mjedisin dhe kërkojnë trajtim të specializuar sipas legjislacionit në fuqi. Autoritetet evidentuan se subjekti nuk dispononte asnjë kontratë transferimi për evadimin, asgjësimin apo përpunimin e këtyre mbetjeve, çka përbën shkelje të rregullave për menaxhimin e mbetjeve të rrezikshme. Në zbatim të dispozitave ligjore, IKMT vendosi masën administrative me gjobë në vlerën e 4,000,000 lekëve. Krahas penalitetit financiar, ndaj kompanisë është marrë edhe vendimi për pezullimin e aktivitetit deri në asgjësimin e plotë të mbetjeve, në përputhje me kërkesat e legjislacionit mjedisor. Rasti rikthen në vëmendje problematikat që lidhen me menaxhimin e mbetjeve industriale në vend, sidomos në sektorët e industrisë së rëndë, ku mosrespektimi i standardeve mjedisore mund të sjellë pasoja të konsiderueshme për ndotjen e ajrit, tokës dhe ujërave përreth. Burimi: Ekofin
Depozitim i paligjshëm inertesh në Dhërmi, IKMT merr masa ndaj kompanisë së ndërtimit
Inspektorati Kombëtar i Mbrojtjes së Territorit ka ndëshkuar me masë administrative gjobë subjektin “Gjikuria”. Drejtoria Qendrore e IKMT-së kreu një inspektim në zonën e Dhërmiut, ku konstatoi një vend depozitimi mbetjesh inerte dhe dherash të dala nga gërmimet në krye të fshatit. Gjatë verifikimit të kryer, subjekti rezultoi se nuk ishte i pajisur me Leje Mjedisi të tipit B, shtojca 5.2. Për shkak të këtyre shkeljeve të konstatuara, IKMT mori masën administrative të dënimit me gjobë në vlerën 1,000,000 lekë. Gjithashtu u mor edhe masa plotësuese e pezullimit të aktivitetit, deri në pajisjen me lejen përkatëse sipas legjislacionit. Kompanisë “Gjikuria” iu ngarkua gjithashtu detyrimi për të eliminuar pasojat e shkaktuara brenda një afati të arsyeshëm, si dhe për të rehabilituar zonën ku janë kryer depozitimet e inerteve. Burimi: Ora News
Raportim MjedisorKLGJ i jep prioritet çështjeve mjedisore dhe të klimës në Gjykatat e Apelit
Këshilli i Lartë Gjyqësor ka zgjeruar listën e çështjeve që do të trajtohen me procedurë të përshpejtuar në Gjykatat e Apelit, duke i dhënë për herë të parë prioritet edhe konflikteve që lidhen me mbrojtjen e mjedisit dhe klimës. Vendimi i publikuar në Fletoren Zyrtare parashikon që çështjet mjedisore të përfshihen në kategorinë e dosjeve që mund të shqyrtohen me përparësi, në rastet kur vonesat në gjykim mund të sjellin pasoja të rënda. Ndryshimet janë bërë në vendimin nr. 78 të vitit 2019 “Për kalendarin e shqyrtimit të çështjeve në gjykatën e apelit”, dokument që përcakton kategoritë e çështjeve që marrin trajtim të përshpejtuar. Përfshirja e çështjeve mjedisore në listën prioritare vjen në një periudhë kur debatet për zonat e mbrojtura, ndotjen, ndërtimet në bregdet dhe dëmtimin e habitateve natyrore janë shtuar ndjeshëm në vend. Deri më tani, procedurat e përshpejtuara në apel aplikoheshin kryesisht për çështje familjare, sociale dhe procedurale, si kujdestaria e fëmijëve, pensionet, marrëdhëniet e punës apo ankimet ndaj vendimeve jopërfundimtare. Vendimi i KLGJ-së vjen ndërkohë që vetë sistemi i apelimit përballet me stok të lartë dosjesh dhe vonesa të konsiderueshme në shqyrtim. Sipas të dhënave zyrtare, vetëm Gjykata e Apelit e Juridiksionit të Përgjithshëm ka mbi 52 mijë çështje në pritje, ndërsa Gjykata Administrative e Apelit ka hyrë në vitin 2025 me afro 24 mijë dosje të pashqyrtuara. Megjithatë, me ndryshimet e reja, organizatat mjedisore dhe qytetarët që ndjekin procese gjyqësore për dëmtimin e natyrës apo shkeljet mjedisore mund të kërkojnë tashmë shqyrtim më të shpejtë të çështjeve në Gjykatat e Apelit. Burimi: Ekofin
Menaxhimi i MbetjeveDyshime për krim mjedisor në Pishë-Poro-Nartë: mjete të rënda në zonë të mbrojtur
Punime të dyshuara brenda zonës së mbrojtur Pishë-Poro-Nartë kanë ngritur alarmin për një tjetër përplasje mes zhvillimit, ligjit dhe përpjekjeve për të ruajtur ato pak zona me rëndësi mjedisore në Shqipëri. Pamje të publikuara të enjten nga Shoqata Ornitologjike Shqiptare (AOS) tregojnë për mjete të rënda dhe ndërhyrje në terren në një nga habitatet më të rëndësishme për shpendët në vendin tonë. Deri më tani nuk ka pasur reagime nga institucionet dhe nuk ka një konfirmim publik për leje ndërtimi apo dokumentacion mjedisor për këto punime. Në terren, aktiviteti duket i organizuar dhe i vazhdueshëm, ndërsa dyshimet lidhen me projekte të mëdha turistike të përfolura prej kohësh në zonë. “Po hapin një kantier në zonë të mbrojtur!” Në një lidhje telefonike për Citizens.al, drejtuesi i AOS, Taulant Bino, tha se kishte qenë vetë në zonë në momentin kur u evidentua aktiviteti. Sipas tij, dhjetëra kamionë hynin dhe dilnin përmes një rruge të sapo rehabilituar, ndërsa në terren ishin të pranishëm ekskavatorë dhe shumë punonjës. “Komunikova me një nga punonjësit aty duke i thënë se isha për vëzhgim shpendësh dhe ata më thanë se kishin nisur hapjen e një kantieri,” u shpreh Bino. Ai shtoi se punonjësit nuk mbanin shenja identifikuese, ndërsa mjetet kishin shënime në italisht, pa elementë që i lidhnin drejtpërdrejt me një kompani të caktuar. Sipas AOS, ndërhyrjet mund të lidhen me projektet e përfolura zhvillimore në zonën e Zvërnecit, të cilat prej vitit 2024 kanë përmendur si investitor të interesuar dhëndrin e Presidentit Amerikan, Jared Kushner. Në këtë kontekst është përmendur edhe Kastrati Group si një nga kompanitë që mund të ketë rol ose si nënkontraktor ose si partner zhvillues, ndonëse nuk ka konfirmim zyrtar. Citizens.al kontaktoi përfaqësuesit për komunikimin me median të kësaj kompanie, të cilët deklaruan se nuk mund të jepnin një përgjigje konkrete pasi “momentalisht shumica e stafit janë ditë pushimi”, duke lënë si mundësi për një reagim për të hënën. Mbi ngjarjen reagoi edhe Qendra për Ruajtjen dhe Mbrojtjen e Mjedisit Natyror në Shqipëri (PPNEA), e cila i bëri thirrje autoriteteve ligjzbatuese të ndalojnë “këtë dhunim të pakthyeshëm të zonës së mbrojtur”. “I kërkojmë qeverisë të ndalojë planet e papublikuara dhe të bëjë transparencë mbi atë që po ndodh në deltën e lumit Vjosa!” citohet në qëndrimin e organizatës. Në përmbyllje, PPNEA theksoi se, edhe pse qeveria ndryshoi ligjin për Zonat e Mbrojtura për të lejuar ndërtimin e resorteve me 5 yje, edhe ky ligj po shkelet pasi rastet tregojnë se nuk po ndiqet asnjë procedurë. Çfarë përfaqëson zona Pishë-Poro-Nartë Zona e denoncuar ndodhet në veri të Vlorës dhe është pjesë e kompleksit ligatinor të Nartës që kufizohet më tej nga delta e lumit Vjosa. Ajo gëzon statusin “Peizazh i Mbrojtur”, që lejon vetëm aktivitete të kufizuara dhe kërkon procedura të rrepta për çdo ndërhyrje, përfshirë vlerësimin e ndikimit në mjedis dhe konsultimin publik. Pishë-Poro-Nartë konsiderohet një nga habitatet më të rëndësishme për shpendët në Shqipëri, ku janë regjistruar rreth 200–300 specie, përfshirë shpendë migratorë me rëndësi ndërkombëtare. Por kjo zonë ka qenë dhe mbetet nën presion të vazhdueshëm zhvillimi. Një nga projektet më të debatueshme ka qenë dhe mbetet Aeroporti i Vlorës, ndërtimi i të cilit ka nisur pikërisht pa leje të zbardhur ndërtimi në vitin 2021, duke u kundërshtuar nga organizata mjedisore për shkak të ndikimit në habitatet e shpendëve. Së fundmi, SPAK ka marrë të pandehur tre anëtarë të Komisionit të Vlerësimit të Ofertave për këtë projekt, nën dyshimin për paracaktim të fituesit të koncesionit. Paralelisht, investime të tjera të përfolura, si resorti turistik në ishullin e Sazanit i lidhur me Kushner, apo ideja për zhvillimin e zonës ligatinore të Zvërnecit me të njëjtin propozim, kanë ngritur shqetësime të reja mbi ndryshimet ligjore që prekin zonat e mbrojtura. Citizens.al ka raportuar vazhdimisht për këtë çështje duke vënë në pah edhe ndryshimin që pati ligji për portet turistike, i cili tashmë u jep të drejtë “investitorëve strategjikë” të privatizojnë edhe detin. Reagimi deri më sot ka qenë i vakët, përgjithësisht nga organizatat mjedisore dhe aktivistë individualë. “SOS: Po grabitemi!” ishte një instalacion në rërë që u realizua me këtë qëllim nga artistë si formë ndërgjegjësimi ndaj këtyre “planeve strategjike”. Deri në momentin e publikimit të këtij artikulli, nuk ka informacion zyrtar nëse aktivitetet e evidentuara në terren janë të pajisura me leje ndërtimi apo dokumentacion mjedisor. Po ashtu, mbetet e paqartë nëse ndërhyrjet lidhen me ndonjë nga projektet e njohura apo përfaqësojnë një zhvillim të ri në fazë paraprake. Në mungesë transparence dhe reagimi institucional, rasti ngre pikëpyetje mbi respektimin e statusit të zonës së mbrojtur dhe procedurave ligjore për zhvillimet në territore me rëndësi të lartë ekologjike. Burimi: Citizens.al
Cilësia e AjritZjarr i madh buzë lumit Shkumbin si pasojë e djegies së gomave, tymi mbulon zonën
Një vatër zjarri është regjistruar buzë lumit Shkumbin, në territor jashtë zonës së ish-Kombinatit Metalurgjik në Elbasan. Sipas informacionit paraprak, bëhet fjalë për djegie gomash në ambient të hapur, e cila ka shkaktuar shtëllunga tymi dhe shqetësim te banorët përreth. Sipas Top Channel, korrespondentja, Bruna Kërçyku, bën me dije se autoritetet sqarojnë se kjo ngjarje nuk ka lidhje me aktivitetin në territorin e ish-Kombinatit Metalurgjik. Shërbimi zjarrfikës ka ndërhyrë menjëherë në vendngjarje dhe po punon për shuarjen e plotë të flakëve dhe vënien nën kontroll të situatës. Ndërkohë, strukturat e Policisë së Shtetit kanë nisur hetimet për identifikimin e autorëve dhe zbardhjen e plotë të rrethanave të kësaj ngjarjeje. Në Shqipëri, rastet e zjarreve të shkaktuara për motive të dobëta apo nga pakujdesia janë duke u shtuar gjithnjë e më shumë. Mungesa e ndërgjegjësimit për dëmet që këto veprime shkaktojnë në mjedis po sjell pasoja serioze për ajrin, tokën dhe ekosistemet. Nëse kjo tendencë vijon, vendi mund të përballet gjithnjë e më shpesh me raste të ndotjes mjedisore dhe krimeve mjedisore që dëmtojnë rëndë natyrën dhe shëndetin publik. Burimi: Top Channel
